Mat 20 | MHL | STEP | Aria Yeesus arekin opora feenap maek, “Mua Maneka pika kemena-pa wiar ikowa nain nanar fain saarik. Mua oko uuriw akena iikirap ikiwok, mauwow mua wia aawemkun yena wain piita-ko saliwomuk naep.

Matthew 20

Yeesus wain piita uuwow mua wia maek

1 Aria Yeesus arekin opora feenap maek, “Mua Maneka pika kemena-pa wiar ikowa nain nanar fain saarik. Mua oko uuriw akena iikirap ikiwok, mauwow mua wia aawemkun yena wain piita-ko saliwomuk naep. 2 Ikiwep mua wia aawemi wia maakek, ‘Ni uuwowa fofa kuisow sesa fuluwa kui-kuisow niinen.’ Eliw naiwkin wia aawep mauwowa wia sesekak. 3 Ne ama urupep iinan-pa areya nainiw ikiwok-na mua papako fofa epa-pa oram maneka nan iimarep ikomakiwkin wia urufak. 4 Ne wia maakek, ‘Ni-ko ikiwep yo wain piita-pa-ko mauweka. Ne ikoka sesa kakeniw niinen.’ 5 Naap wia maakeya eliwa naep ikiwemik. Aria ama pokap ikaeya nainiw ikiwemi sira naapiw onak. Ne ama moke ifaneya nainiw ikiwemi sira naapiw onak. 6 Ne aria urer akena naap, kiiriw fofa epa ikiwok-na mua papako oram maneka nan iimarep ikaiwkin wia nokarek, ‘Ni oram maneka mauwowa marew fan ikomakeman nain moram?’ 7 Ne wis-ke maakemik, ‘I uuwowa-ko me yia aawemik oo.’ Naeya wia maakek, ‘Ni ikiwep wi mua papako yo wain piita-pa uuwam-ikaimik nain wiamiya uuweka.’ Ne ikiwemik.

8 Aria ama orop kokoma teneya manin onoma nain-ke ona uuwow woos mua maakek, ‘Uuwow mua wia farep sesa wie. Wi mua uuwowa murarep kereremik nain-ke miimuk, ne mua mokomokoka kereremik nain-ke muraruk.’ Naap maakek. 9 Aria wi mua aakisa fan uuwowa kereremik nain maamuma fuluwa kui-kuisow wiemik. 10 Ne wi mua uuriw akena uuwowa onoma wuamik nain sesa aawowa ekapemi kema-pa maemik, ‘Aa, i sesa lawisik maneka opiyen.’ Naap maep kema wuam-ikemik-na weetak, wis pun sesa epaskun naap opamik. 11 Aria wi sesa naap opap urufap manin onom mua nain amukaremi maakemik, 12 ‘Wi mua murarep kereremik nain lawisiw muuta uuwamik. Ne i ama iriniya uuwami oospowa fienamik. Nain no sesa epaskun maneka yien!’ 13 Naap amukariwkin manin onom mua-ke uuwow mua oko maakek, ‘Emar, yo sira samora-ko me nefa onam, weetak. Yo maamuma fuluwa kuisow niowa nain iiriw yiam erup aakunep opora kaikamik, ae-na? 14 Naapeya no naap aawep ikiwe. Yo yena kookalowa-pa sesa niem nain naap wi mua murarep kereremik nain pun wiowa maem. 15 Maamuma yena maamuma-ke, ne yo yena kookalowa-pa oniyem, naareke efa mainon? Yo sira eliwa wia onam nain no moram naep efa mokepin?’ Naap maakek.”

16 Aria arekin opora nain welawami wia maakek, “Naapeya wi mua Mua Maneka pika kemena-pa wiar ikemik nain, wi murarowa-pa ikemik nain ikoka miimikuan ne wi miimowa-pa ikemik nain ikoka murarikuan.”

Yeesus ona umowa nain wia maakek

(Mak 10.32-34, Luk 18.31-33)

17 Aria Yeesus Yerusalem urupem-ikok era-pa ona teeria ten kuisow erup nain wia aawep kua wia pekap wia maakek, 18 “Aria miimeka, i aakisa Yerusalem ikiwimik. Ikoka neeke Mua Muuka opap wi pris woos mua ne sira amis mua wapena-pa wuikuan. 19 Opap opora-pa wuami ifakimowa opora anumap owow oko mua wapena-pa wiar wuikuan. Ne wis-ke sarua waremi firekami niirow opora onap nomokow moke-pa patot warikuan, ne uminon. Umep fofa arow-pa iikirinon.” Opora naap wia maakek.

Yems Yon ikos unum maneka aawu naep maemik

(Mak 10.35-45)

20 Aria naap ikiwem-ikok Sebedi emeria ona muuka erup wia aawep Yeesus wiar ekamik. Ekap miir onoma-pa keema muuna mikap ikok maakek, “I maa-ko kookalep epamik.” 21 Naeya nokarek, “No maa mauwa kookalin?” Ne os-ke maek, “No owow saria maneka areya-na yo muuka erup fain no wameiya-pa, oko-okaiwi pokuk.” 22 Ne wia maakek, “Ni maa amisarep efa nokareman-i? Yo efa samorami sirirowa yiimik nain nis pun eliw aawowen-i? Ni pepek-i?” Ne maemik, “Ae, i eliw aawiyen.” 23 Naeya wia maakek, “Eliw, yo sirirowa aawiyem fain ikoka nis pun aawowen. Nain yo oko-okaiwi efar pokowa efa nokareman nain me yo maa-ke, weetak. Epa nain iiriw yena Auwa-ke wia pepekimep-puomak, wi nain neeke pokikuan.” Naap maek. 24 Ne aria Yeesus ona teeria mua papako-ke opora nain miimap wiam erup nain wia kema bagiwiramik. 25 Naeya Yeesus-ke epowa wia maakeya epiwkin wia maakek, “Ni amisareman, miiw unowa wi owow oko saria-ke sira kekanow akena wia urufam-ikemik. Ne wiena woos mua pun maimik, wi emeria mua i tepak-pa yiar ikok opora yiar miimam-ikauk. 26 Nain ni sira naap nain me oneka. Ni teeria fain mua-ko woos mua maneka arekam naep-na wame poromi taar teekow mua niar ikainok. 27 Ne mua-ko miimowa-pa niar ikainen naep-na uuwow mua puukap ni tepak-pa niar ikainok. 28 Moram Mua Muuka pun naap, me ni mua-ke yo tepak-pa efar ikok mauwomuk naep ekapem, weetak. Yo ni nia asipekam naep ekapem. Ne umep emeria mua pina wiar iiraremi wia aawinen.” Naap wia maakek.

Yeesus wi mokok opa wia saliwak

(Mak 10.46-52, Luk 18.35-43)

29 Aria Yeesus ona teeria unowiya Yeriko-pa ikok ikiwem-ikaiwkin wi yakeyak maneka wiokap ikiwemik. 30 Mua mokok opa wiam erup era pona-pa pokap ikemik. Ne Yeesus fan ekapiya maiwkin miimap faremik, “Maneka oo, Dewit nembesir, i-ko yia kemale oo.” 31 Ne wi Yeesus ookam-miemik nain-ke wia kakankami wia maakemik, “Ni poporareka.” Ne wia, kerew akena farem-ikemik, “Oo Maneka, Dewit nembesir, i-ko yia kemale aa!” 32 Aria Yeesus ikim-ikok naap miimap iimarep wia farek. Ekapiwkin wia nokarek, “Yo kamenap nia asipinen?” 33 Ne maakemik, “Aa Maneka, i mokoka-ko yia saliweya maa urufiyen.” 34 Naap maiwkin wia kemalep mokoka wiar opak. Mokoka wiar opeya ewursow maa urufamik. Ne Yeesus murarep ookamik.